"Nmia -tɩ -nʋʋa Elimelɛkɩ 'a -gbu" -sɔn nyʋ "jrii ɛ
1
Nɔ" -ɛ 'di 'Peejeʋn 'bleea Israɛ -blʋa a, ɛmɛ 'mɩɛ klaa" ji 'de ɛɛ' 'blʋa tu "kpei. 'Sʋ "ju due' -wlʋa 'e Bɛtɩlɩɛmʋ 'de Suida 'a 'blʋa 'a 'fɔ o ɛ, ɔmɔ -duo" ɔɔ' 'nynɔ ke ɔɔ' "nynuu nmai -nɩa 'sɔɔn 'ʋn, -wɛe -ɔ mu' 'de Moabʋ -blʋa "kpei -tea'. 2 a Ɔɔ' "ju tu 'a 'nynɩ -nɩ Elimelɛkɩ, ɔɔ' 'nynɔ -nɩ Naomi, ɔɔ' "nynuu nmai 'sɔɔn -nʋ a' 'nynɩ -nɩ Malɔn ke Kilɔn ke. Ʋʋ nɩɛ Eflata nyʋ -o, 'de Bɛtɩlɩɛmʋ 'de Suida 'a -nɛ 'blʋa 'a 'fɔ o. Ʋʋ nynia 'e Moabʋ -blʋa 'di 'sʋ ɛ, ʋʋ "ti 'e 'wɛ. 3 'Sʋ Naomi 'a kʋan Elimelɛkɩ 'a 'mɛɛ 'mʋa-, -wɛe ʋ ke ʋa' "nynuu nmai -nɩa 'sɔɔn sie'. 4 Ʋʋa' "nynuu nmai 'sɔɔn -nʋ, ʋʋ "duɛ Moabʋ -nynʋkpae' 'ʋn. Ʋʋa' due' 'a 'nynɩ -nɩ Ɔɔpa -wɛe due' 'a 'nynɩ nɩ Ruitɩ. b -Sʋn ʋʋ nʋa 'de Moabʋ -blʋa "kpei ɛ, ɩ 'bɛɛ -sʋn -puue 'mɛ. 5 'Sʋ Malɔn ke Kilɔn 'ɔ -tɩ' 'kpaa -ke. Ʋa' "nynuu nmai -nɩa 'sɔɔn ke ʋa' kʋan 'a -tɩ' 'kpa kan' 'sʋ ɛ, ʋa' 'sʋ -sie 'e.Naomi ke Ruitɩ jiɛ Bɛtɩlɩɛmʋ
6 Naomi 'wɔn ɛ ka Nyɔsoa poa ʋʋa' "bli blʋa 'a -tɩ' -kwlʋ o ɛ, -wɛe ɛ "nyɩa ʋʋpʋ diidɛ ɛ, 'sʋ Naomi "duɛ dɩ 'ʋn -wɛe ʋ ke ʋʋa' "nynuu 'a 'nynʋkpae 'je 'de Moabʋ -blʋa 'di 'wlʋ. 7 Ʋʋa' -ɩn -wlʋ 'e -ta ʋʋ -tea, -wɛe -ɩn -kpa 'e Suida blʋa "kpei -jei" -nao. 8 'Sʋ Naomi wlu 'de ʋa' "nynuu 'a 'nynʋkpae -pee ʋ 'na:
Ao "bii e "jru de, ao 'je ao de -wi" o -gbu" -sɔn' mu due' 'due. - Ka ao toa aoa' nyiɔ 'ɔ -tɩ' kma sʋn 'de nyʋ -mɛa ke 'mɔ -pee ɛ, Nyɔsoa to kan' ɛɛ' nyiɔ 'ɔ -tɩ' kma sʋn 'de ao -pee -ke. 9 Nyɔsoa nʋɛ -wɛe jra dee aoa mua "tia a, ao 'je 'e 'flɛ 'ʋn nɩ 'demu.
'Sʋ Naomi -gblee -ɛ ʋʋpʋ -kwlɩ", ka ʋʋ -nɩa 'nynʋkpae 'sɔɔn -teɛ -fɩn" 'a -wuɔ' -wuɔ', 10 -wɛe ʋʋ wlu Naomi -pee, ʋʋ 'na: "Ɩɩn-, a ke -aa muɛ 'de aa' 'cɛ "kwlu.
11 'Kaa Naomi 'na: Ao mu de, 'ma "nynuu, dɛɛ-tɩ ao 'je 'de 'ʋn 'de bla a-? 'Ɩn se 'bɛɛ 'ɩn 'je "nynuu nmai jrʋ' 'wlʋ 'bode, -wɛe ao 'je "bli "ti. 12 Ao mu aopʋ- "bli de, 'ma "nynuu, ao mu! 'Ɩn 'kpa -kea" jra dee "ti -tɩ. 'De -bo 'ɩn 'na: 'Ɩn 'bɛɛ 'ɩn 'je "nynuu nmai dee 'wlʋ mɔ 'de ɛ, 'ma muɛ "tia 'de "maʋ wɩ -nɩ 'di, -wɛe ɔ ke 'ɩn 'je "nynuu nmai nynuu 'wlʋ, 13 aoa muɛ -mʋ 'a "i 'bɛa fua' -gbɔ? Aoa muɛ jra "tia "nao 'a mamaʋ 'sʋ 'de -mɛ 'ɛ -tɩ' 'ʋn? "Ɩɩn-, 'ma "nynuu. 'Kle 'ma 'jea, ɛ -siɛ' -jei" ɛ je aopʋ 'a -nɩ -sii. Dɛ-nʋɛ', ɛ nɩ Nyɔsoa 'a -cɛ" -sa 'ʋn sʋn -pʋn".
14 'Sʋ ʋa' "nynuu 'a 'nynʋkpae -nɩa 'sɔɔn -teɛ -fɩn" 'a -pʋn" kewlɛ'. Ɛɛ 'bɔa 'emu 'sʋ, Ɔɔpa -mʋ -gbleeɛ Naomi -kwlɩ", -wɛe ʋ pʋ wlu. 'Kaa Ruitɩ -mʋ 'nɛ Naomi -pʋn".
15 'Bomɔ Naomi wluu Ruitɩ -pee ʋ 'na: Aa 'jee, aa' "tieʋn mʋ -ʋa mua 'de ʋa' 'cɛ o, ke ʋa' "juɛi -gbɛɛ -kɩɩ'- o de, a nʋ ka aa' "tieʋn nʋa, a mu de -ke 'de aa' 'cɛ o.
16 'Kaa Ruitɩ -sɛ "kpei ka, ʋ 'na: Naomi, a 'bo 'ʋn -klan" "kpei -teeɛ -wɛe 'ɩn 'bo aʋn sie ɛ 'de 'ɩn 'bo de muɛ.
-Ta aa mua 'bomɔ 'ma mu,
-Ta aa mua "tia 'bomɔ 'ɩn 'je "ti.
Aa' 'cɛ mʋ -ʋʋa mu 'ma 'cɛ nɩa'.
'Mɛa mɛ -je a ke 'ʋn i -seea'-. -Bo ɛ se -mɛ nɩ ɛ, -mɛ Nyɔsoa 'kpaa 'ʋn 'cɛn klaa" i, -wɛe ɛ 'je 'ʋn dɛ "jri i nʋ.
18 Ka Ruitɩ nɩa "i ʋ ke Naomi 'jea mu, Naomi 'jea kan' 'sʋ ɛ, ʋ 'bɔ ʋ o wlu -tɩ 'mɛ.
19 Ka ʋʋ nɩa 'sɔɔn ʋʋ mu' mamaʋ 'sʋ ʋʋ je 'de Bɛtɩlɩɛmʋ nyni.
-Ta ʋʋ paa 'de Bɛtɩlɩɛmʋ ɛ, -kwlɔ -wee' -suua' i 'de ʋʋpʋ 'a -tɩ' 'ʋn, -wɛe 'nynʋkpae a wlu ka, ʋʋ 'na: Naomi ko -taa?
20 'Kaa Naomi wlu' ka 'de ʋʋ -pee, ʋ 'na:
'Ma 'cɛ, ao 'bo 'ʋn Naomi 'daa 'bode, ao 'daa 'ʋn Mala ("Jri i "kae i), dɛ-nʋɛ', "ikma Kea poɛ 'ʋn wɛe nyɔ. 21 -Ta 'ma mua tɛin" 'de ɛ, -mɛ 'de 'ʋn 'kwa "jii, -wɛe Nyɔsoa ja 'ʋn de -mɛ 'ɩn flɔn kwa. "Ikma Kea kpa 'ʋn sʋn -pʋn", -wɛe ɛ poa ʋn wɛe nyɔ 'ee, -mɛ dɛɛ -tɩ aoa 'daa 'ʋn Naomi ɛ-?
22 Ka Naomi ke ʋa' "ju 'a 'nynɔ Ruitɩ -nɩa Moabʋ 'nynɔ, nʋa 'de Moabʋ 'a wlao 'di 'wlʋ sʋn, 'kamɔ -nao. Nɔ" -ɛ 'di ʋʋ nynia 'de Bɛtɩlɩɛmʋ ɛ, ɛ nɩɛ ɔkɩ dee 'a cɛan' 'a -tee nɔ" -o.